Вести

Специјалната јавна обвинителка Катица Јанева денеска се врати на работа во СЈО, информираат од Обвинителството за Фокус.

Јанева, сѐ уште не добила покана да се појави на распит во Обвинителството за гонење на организиран криминал и корупција, а во однос на истрагата за „Рекет“, во која засега има двајца осомничени Бојан Јовановски и Зоран Милевски -Кичеец.

За потсетување, досега одекнаа три снимки за Рекет, каде обвинети се Бојан Јовановски познат како Боки13 и бизнисменот Зоки Кичеец. Во послендото видео се слуша гласот на специјалната обвинителка Катица Јанева, која му вели на Камчев дека се ќе биде добро, а Боки13 го споменува и Зоран Заев.

Специјалната јавна обвинителка Катица Јанева во писмена изјава, објавена на веб-страната на СЈО, во врска со објавените разговори, повторува дека во интерес на предистрагите и истрагите што се водат во Jавното обвинителство кое го води, повеќе пати разговарала со разни лица, во обид да се издејствуваат подобри позиции во кривичните предмети, а тоа често се случувало да се одвива преку од нив назначени посредници.

-Во конкретниот случај, во тој период, се водеа преговори од моја страна со лицето О.К. да стане соработник – сведок во една нова предистрага што ја водевме во Обвинителството, заедно со еден од моите помошници обвинители, посочи во изјавата Јанева.

Од денеска стапуваат на сила измените и дополнувањата на Законот за земјоделското земјиште. Со тоа, од денеска започнуваат да течат роковите за поднесување на барања за воведување во владение за договорите за закуп на државно земјоделско земјиште кои се склучени пред денот на влегувањето во сила на овој закон, а кои не се воведени во владение повеќе од една година од денот на склучувањето на договорот за закуп. Почнувајќи од денеска во следните 15 дена сите оние кои треба да го воведат во владение ова земјиште, имаат можност до Подрачните единици на Министерството за земјоделство, шумарство и водостопанство во регионите кадешто се наоѓа земјиштето, да поднесат барање за воведување во владение.

Воедно, од денеска започнува да тече и рокот за поднесување на барања за склучување на нови договори за закуп на државно земјоделско земјиште, од сите физички и правни лица на кои поради неплатена закупнина им е раскинат договорот за закуп во период од една година пред денот на влегување во сила на овој закон, а земјоделското земјиште предмет на договорот е сеуште во нивно владение. Ова е една од измените со којашто се овозможува и се дава шанса на сите закупци кои во рок од 60 дена ќе достават доказ за платена закупнина со казнена камата за задоцнето плаќање и надмест на штета во висина на годишната закупнина за периодот за кој го имале во владение земјоделското земјиште без правен основ, да имаат можност за склучување на нов договор. Новиот договор ќе биде склучен под истите услови за преостанатиот временски период од претходниот договор.

Со измените и дополонувањата на Законот за земјоделското земјиште, ќе се овозможи правилна распредлба на државното земјоделско земјиште и ставање во функција на целокупното обработливо земјоделско земјиште.

Инаку со дел од законските измени се овозможува изградба на објекти за промоција на земјоделските производи и објекти за спортско рекреативни активности, а за првпат одгледувачите на пчели добиваат можност да земат државно земјоделско земјиште, и тоа со намена за поставување на пчелни семејства. Младите земјоделци до 40 години се ослободуваат од плаќање закупнина во првите 3 години од склучување на договорот за закуп.

Со измените на Закон за земјоделско земјиште се овозможува еднаков третман на сите кои сакаат да закупат државно земјоделско. Имено, сега и земјоделците кои веќе имаат добиено површини до 3 ха ќе имаат право на учество на оглас и проширување на својот земјишен фонд до 10 хектари. За прв пат со овие измени се овозможува измена на бизнис планот во ситуации кога неговата реализација е неизвесна поради невоведување во владение навремено или промена на културата пропишана во бизнис планот со што земјоделците можат слободно да го преориентираат своето производство, доколку истата измена не влијае нa времетраењето на закупнината. Со измените се отвора можност за доделување под закуп на земјоделско земјиште на кое е подигнат долгогодишен насад од непознат сторител, и на овој начин се создаваат услови за ставање во функција на целокупното земјоделско земјиште и зголемување на обработливите површини.

Изминатиов месец сме сведоци на една огромна криминална афера која ги тресе темелите на важни државни институции и ја доведува под прашање, уште повеќе од досега, довербата на граѓаните во нас, политичарите и во сопствената држава.
Јас, јавно, уште на самите почетоци на аферата „Рекет” го кажав својот став дека сум разочаран од тоа што го слушнав и повикав на брза и темелна истрага. Наместо тоа, надлежните отидоа на годишен одмор како да се работи за редовна состојба и за рутински предмет, а, не е така.
Аудио и видео снимките кои се споделуваат на медиумите изминативе денови предизвикуваат длабоко разочарување кај сите граѓани, а особено кај оние кои со години и по цена на постојани притисоци и закани од поранешната власт протестираа секојдневно барајќи правда. Револтот кај граѓаните е огромен и сосема оправдан. И јас, како граѓанин, како човек, не како претседател, сум разочаран затоа што се изневерени и моите очекувања и тоа најмногу од луѓето од кои очекуваме да се борат за правна држава.
Свесен за мојата одговорност како претседател на сите граѓани и мојата должност да ги штитам интересите на државата и нејзините граѓани, нејзиниот просперитет и безбедност, како и реализицијата на стратешките надворешно-политички цели кон кои во изминативе две години забрзано се движиме – НАТО и ЕУ, барам од надлежните институции:
1. Ефективно, брзо и темелно завршување на истрагата почитувајќи го начелото на презумција на невиност,
2. Доколку има докази да се поднесат обвиненија против сите инволвирани без разлика дали се носители на јавни функции или не,
3. Освен кривично-правната одговорност, доколку има друга, било каква поврзаност со случајот, во смисла на давање на заштита на лицата под истрага, инсистирам и на политичка одговорност на политичарите, независно дали се од власта или од опозицијата. Во овој контекст е најдобро, сите оние чии имиња се споменати, независно дали со основ или намерно, само со цел да бидат дискредитирани, самоиницијативно да дадат изјави пред надлежниот обвинител со цел да покажат дека пред законот и пред јавноста сме сите исти. Јавноста има право да ги знае нашите ставови, дури и ако се работи за најневеројатни конструкции или шпекулации произведени со нечесни намери.
Длабоко верувам дека ние политичарите сме со поголема одговорност од другите граѓани, затоа и нашите, евентуални противзаконити дејствија треба да бидат процесуирани со поголемо внимание и дури и построго казнувани во однос на другите граѓани. Во оваа смисла очекувам зголемен мониторинг и од медиумите и при тоа, треба да ни биде помалку битно кој ги набавил или кој ги дистрибуирал снимките, од тоа дали содржината на разговорите е вистинита или не. При тоа, барам од медиумите, се разбира, без да се нарушува слободата на јавно информирање, внимателно да ги проверуваат информациите пласирани од разни страни, затоа што лажните вести немаат за цел да ја информираат македонската јавност, туку да ја поткопаат вербата на граѓаните во правдата и во државните институции.
4. Како претседател давам целосна поддршка на надлежните институции, а особено на обвинителството и судот и ќе ги употребам сите уставни и законски овластувања за да ги заштитам од притисоци. Исто така, ќе ги употребам сите законски овластувања да ја заштитам националната безбедност од обиди за нејзино нарушување било од надвор, било од внатре.

Почитувани граѓани,
Оваа тешка ситуација ја става на огромен тест правната држава, надлежните институции и сите нас, одговорните политичари. Ако надлежните правосудни органи ја истераат работата до крај, а, повторувам – очекувам така да биде и никако поинаку, во тој случај ќе докажеме дека навистина функционира системот, а тоа е најдобриот начин да се врати довербата на граѓаните и на целокупната јавност во органите на прогонот. Во спротивно, ризикуваме нашите граѓани да ја загубат вербата во сите нас, политичарите и во својата држава, но, овој пат, дефинитивно.
Од она што досега е јавно познато, за жал, извесно е дека во случајот се вмешани луѓе од различни профили. Во неодамна објавените аудио снимки се слушаат гласови на бизнисмени, дури и на обвинителка, се споменуваат имиња на истакнати личности. Одговорност, повторувам – мора да има и по вертикална и по хоризонтална линија. Одговорност и казни мора да следат за сите чија вина ќе се докаже, без разлика дали станува збор за обвинители, членови на политички партии, бизнисмени, политичари. Никој не смее да биде над законите во оваа земја, ничија партиска или политичка припадност не смее да биде посилна од правдата. Оние кои тоа не го знаат или не го почитуваат треба да им го отстапат своето место на оние кои тоа го знаат и го почитуваат.

Почитувани граѓани,
Како што верував и јавно ја бранев институцијата СЈО во последниве 4 години и денес длабоко верувам дека институција која ќе се бори против високата корупција и криминалот на функционерите и е повеќе од потребна на нашата држава. Со својот минат труд, СЈО, не поединци, туку како институција, заедно со Преспанскиот договор даде огромен придонес за ослободување на заробената држава и за нашето приближување кон НАТО и ЕУ. Сите досегашни истраги на СЈО, сите изведени докази не можат да бидат прогласени за невалидни, по дефиниција, па дури и ако се докаже дека некои обвинители работеле спротивно на законот. Евентуалната индивидуална одговорност на еден обвинител не може да го доведе во прашања огромниот труд на целото обвинителство и сите оние докази кои се изведени во законска процедура.
СЈО, позиционирано внатре во системот на редовното јавно обвинителство, треба да продолжи да ги истражува криминалите на претходната власт, но, и криминалите на актуелната власт и на било која власт во иднина. Нема правна држава ако власта ги гони само криминалците на предходната власт, а не и криминалците во своите редови.

Почитувани,
Не се сите обвинители во СЈО и во редовното обвинителство корумпирани, не се сите судии корумпирани. Најголемиот дел од обвинителите и судиите се доблесни професионалци со интегритет. Во оваа држава имаме доволно чесни и способни луѓе со образ. Меѓутоа, тука, главната улога треба да ја одиграат политичарите, и во тоа ја гледам направената кардинална грешка. Генерации политичари пропуштија многу одамна да создадат амбиент во кој чесните и професионални кадри во судско-обвинителскиот систем ќе си ја вршат својата работа без притисоци од страна, а корумпираните ќе се соочат со правдата. Меѓутоа, не е предоцна и денес, час поскоро, ние тоа да почнеме да го правиме.

Сите политичари не се исти. Ние ја добивме довербата на граѓаните со тврдењето дека не сме исти со претходните, но, тоа мора секој ден практично да го докажуваме. Во оваа смисла јас имам цврста намера да го дадам својот придонес, без остаток.

По официјално потврдување на присуство на болеста африканска свинска чума во реоните на Белград и Смедерево, во соседна Србија, заради заштита од внесување на вирусот на африканска чума кај свињите во Република Северна Македонија, денес, Агенцијата за храна и ветеринарство донесе решение за забрана за увоз и транзит на домашни и диви свињи, семе, јајца и ембриони од свињи од оваа земја. Забраната се однесува и на увозот на свинско месо, производи и подготовки од свинско месо и други производи кои содржат свинско месо, како и на нус производи.

Од петокот, на сила е и донесеното решение за задолжително лабораториско испитување на присуство на вирусот на африканска свинска чума на секоја увозна пратка од свинско месо, производи и преработки од свинско месо, мешовити производи кои содржат свинско месо и други производи од свињи, како и нус производи и деривати на нус производи од свињи.

Пратките нема да се пуштаат во промет се до добивање на резултатите од лабораториските испитувања кои ќе се вршат на Факултетот за ветеринарна медицина.

Во Република Северна Македонија африканска свинска чума нема, состојбата будно се следи, а превентивните мерки се подигнати на максимално ниво.

Претседателот на Република Северна Македонија, Стево Пендаровски, го потпиша указот за прогласување на Законот за ратификација на Договорот меѓу Владата на Република Северна Македонија и Владата на Република Србија за воспоставување заеднички контроли на граничниот премин за меѓународен патен сообраќај Табановце (Република Северна Македонија ) – Прешево (Република Србија).
Со договорот, потпишан меѓу владите на Северна Македонија и Србија на 12 јули 2019 година во Белград, се предвидува воспоставување на заеднички контроли на граничниот премин Табановце – Прешево.
Претседателот Пендаровски смета дека воспоставувањето на заедничките контроли позитивно ќе придонесе за натамошното унапредување на билатералната комуникација меѓу Република Северна Македонија и Република Србија, и ќе придонесе за олеснување на движењето на граѓаните и трговската размена, а ќе се поедностави и регулацијата на сообраќајот на државната граница.
Според претседателот Пендаровски постигнатиот договор треба да претставува поттик во насока на овозможување на заеднички контроли и на граничните премини со другите соседни држави.

Денешната средба меѓу работните групи на власта и опозицијата во Министерството за правда заврши без напредок.

И натаму остануваат клулчните разлики помеѓу двете страни за персоналниот состав на идното јавно обвинителство за гонење на организиран криминал и висока корупција и за иднината на предметите кои СЈО ги отвори пред и по завршување на законскиот рок.

По завршување на средбата претставникот на ВМРО-ДПМНЕ Антонио Милошоски изјави дека очигледно власта не е спремна да се откаже од контролата врз обвинителството за организиран криминал и корупција но не е спремна да се откаже ниту од обвинителката Вилма Рускоска која според нив се однесува како адвокат на високи функционери на власта кои очегледно се вмешани во аферата рекет.

Според министерката за правда Рената Дескоска барањата на ВМРО-ДМПНЕ се ретроградни и сталинистички.

– Со ваквите барања ВМРО-ДПМНЕ очигледно има за цел да ја намали ефикасноста на обвинителството за организиран криминал и корупција.

На прашање дали е оптимист дека законот ќе се донесе до 15-ти септември Дескоска вели дека очекува опозицијата да ги стави државните интереси пред партиските и да ги промени своите барања.

Поради летните одмори разговорите меѓу власта и опозицијата за законот за јавно обвинителство ќе продолжат по 15 август.

Претседателот на Владата на Република Северна Македонија Зоран Заев, заедно со претседателот на Владата на Република Бугарија, Бојко Борисов, по заедничката прес-конференција, придружени од страна на министрите за надворешни работи на двете земји Никола Димитров и Екатерина Захариева, оддадоа почит и положија венци на вечното почивалиште на Гоце Делчев во црквата „Свети Спас“ во Скопје.

Во склоп на оваа посета, премиерите на двете држави, е предвидено да положат цвеќе на споменикот на полковникот Константин Каварналиев во Дојран.

Министерката за труд и социјална политика Мила Царовска и преставници од министерството денеска имаа работен состанок со членовите на Македонската банкарска асоцијација. На состанокот пред банкарите беше презентиран новиот Закон за практиканство којшто е на сила од крајот на минатата година и можноста за негова примена во банкарскиот сектор.

“На иницијатива на стопанските комори направивме законска рамка со којашто се дава простор компаниите да ангажираат невработени лица на практична работа. На овој начин ја зголемуваме вработливоста на младите лица, но и можноста за избор на квалитетен кадар” рече министерката Царовска на состанокот.

Маја Стевкова Штериева, Претседателка на Македонската банкарска асоцијација рече дека Законот дава можност за опфаќаме и на среднистите за дел од работните места со коишто во моментот банкарскиот сектор се соочува со недостиг како што е ИТ кадарот”, рече Стевкова Штериева.

Со Законот за практиканство се дава можност за работно ангажирање на сите лица коишто не се во работен однос, а имаат завршено најмалку основно образование и се на возраст до 34 години. Законот овозможува платена практична работа во траење од 6 месеци. Во првите три практикантите добиваат добива надосместок од околу 5.000 денари, а во следните три месеци надоместокот е во висина на минимална плата.

Министерот без ресор задолжен за странски инвестиции Елвин Хасан беше во работна посета на Јалова, Република Турција. Во текот на својот престој во Јалова, министерот Хасан оствари средба со претставници на Стопанската комора на Јалова. Фокус на средбата беа новите економски политики и подобрената бизнис клима која е привлечна и за домашни и за странски инвеститори. Министерот Хасан им ги презентираше новите измени на Законот за Финансиска поддршка на инвестиции кои беа усвоени со цел да се подобрат условите за деловно работење и да се зголемат инвестициите со што ќе се поттикне економскиот раст на македонската економија. На средбата исто така се дискутираше за актуелни прашања и предизвици во поглед на бизнисот и инвестициите, министерот Хасан ги покани претставниците на Стопанската комора да ја посетат нашата земја, да го увидат нејзиниот потенцијал и ги охрабри да инвестираат во Република Северна Македонија.

Во склоп на посетата на Јалова министерот оствари работна средба со градоначалникот на Јалова, г-дин Вефа Салман и гувернерот на Јалова, г-дин Муаммер Ерол. На средбите се разговараше за актуелните регионални случувања, можноста за проширување и продлабочување на соработката помеѓу Република Турција и Република Северна Македонија, а воедно беше изразено и задоволство за добрите пријателски односи од двете страни.

Претседателот на Република Северна Македонија, Стево Пендаровски, денеска оствари посета на Сојузот на Стопански комори на Македонија.
На средбата со стопанствениците, претседателот Пендаровски се осврна на неколку најважни работи, за кои како што нагласи, треба да има договор и консензус, а пред се треба да се работи на подобар амбиент за компаниите.
„За жал во изминативе години и децении ние политичарите не ви помогнавме многу во таа смисла. Себеси не се изземам од таа категорија на луѓе затоа што јас сум над 20 години активен во јавниот живот, иако сум само 2 месеци Претседател. Значи, ако можам на некој начин да се извинам во името на сите претходни генерации политичари што не ви го направиле животот и бизнисот полесен, за да на сите нас понатаму ни биде полесно, еве тоа го правам. Најмалку во лично име. Значи навистина мислам дека во изминативе 30 години како независна држава, политиката правеше се, и преку оваа поларизација и на многу други начини, да го попречи бизнисот или што е најтрагично да го стави под своја капа. Бизнис под политичко менаџирање е со ефект само за оние кои го менаџираат, не и за народот, не и за граѓаните. Јас се надевам дека последниве две години имаме позитивни исчекори во спротивна насока, дека бизнисот треба постепено да се ослободува од политичките стеги“, нагласи Претседателот.
Претседателот Пендаровски се осврна и на крупната афера од последните десетина дена.
„Последниве денови сме сведоци на една крупна афера која има многу шпекулации, која очигледно оди низ многу слоеви на нашето општество, и економски, и криминални, и политички, за жал. Јас од оваа позиција не гледам политички притисок ако кажам дека инсистирам државните органи во таа таканаречена ситуација или случај „Рекет“ да ја истераат работата што е можно побрзо, до крај, навистина до крај, за да не се остави ни најмал простор за сомнеж дека некој некого штити или дека повторно се рециклираат некои лоши практики од минатото, кога одредени политички фактори штитеа бизниси, односно беа заштита за криминалните бизниси, и на тој начин знаеме до кое дереџе дојдовме. Значи, Европската комисија во својот извештај во 2017 година не дефинира како заробена држава, имено најмногу заради политичка поларизација, меѓутоа и заради тоа што бизнисот се знаеше кој може да го прави и кој смее да влезе воопшто на тоа поле“, рече претседателот Пендаровски.
Тој истакна дека пред неколку дена го комплетирал економскиот тим, кој ќе му помага во истакнување на економскиот аспект на надворешните односи и на дипломатијата, а кој бил запоставен од почетокот на нашата независност, при патувањата надвор. Претседателот нагласи дека ќе настојува со него да бидат и економските министри, без разлика која гарнитура е на власт, а од бизнис секторот да добива информации за состојбите и нивните барања. Тој рече дека задача на Претседателот е да се намали поларизацијата и поделеноста во државата.
„Моја задача, бидејќи сум платен од вашите пари, е тоа да се обидувам да го правам до крајот на мандатот и тука нема суети, нема повредено его. Јас морам да се јавам кај тие луѓе кои се актери на политичката сцена со кои досега не сум направил комуникација, а кои се битни за вкупниот амбиент, да се обидувам да ги добијам. И јас ќе ги барам и бидете убедени дека ќе направам се да ги намалам тие тензии, бидејќи мислам дека барем за неколку работи кои се стратешки битни за државата, не треба да се расправаме“, рече претседателот Пендаровски, посочувајќи ги нашите стратешки приоритети, економскиот развој, комплетно интегрирање во ЕУ и НАТО и меѓуетничките односи.
„Северна Македонија мора да биде комплетно интегрирана во евроатлантските структури. Членството во НАТО е битно како предуслов за безбедност, па понатаму за економски развој. Значи тука партиите не смеат да имаат разлики. Нашето интегрирање или приближување кон НАТО оди со задоволителна брзина. Имаме многу позитивна најава од американскиот Сенат дека во наредниве два месеци можеме да ја завршиме и таа ратификација на практично клучната држава во Алијансата и во почетокот на декември да станеме полноправна членка. Тоа е битно затоа што на тој начин, по дефиниција истиот момент, амбиентот за правење бизнис станува предвидлив. А во однос на Европската унија сите заложби и јавни искажувања се дека ние ќе добиеме датум за преговори до крајот на годината, како што беше планирано. Да ги завршиме што е можно побрзо тие преговори со Европската унија и низ тие преговарања да ја направиме државата подобра, се разбира побогата“, рече претседателот Пендаровски.
Претседателот јасно посочи дека нема да потпише ниту еден указ на закон ако бизнис заедницата смета дека не е во нивен интерес и во интерес на граѓаните. Битно е, рече, да им се даде шанса на младите за нивно прво вработување во земјава.
Со Владата се почнати разговорите за нови дипломатски претставници, бидејќи во моментов во 27 држави сеуште нема назначено прв човек во дипломатско конзуларните претставништва на државата. Претседателот подвлече дека високата политика треба да го отстапи местото за луѓе кои ја разбираат економијата.

Претседателот посочи дека нема отворени прашања со соседите, по двата потпишани договори, и дека идната година не очекува мирна година. Независно од информациите, рече претседателот, нема да се вратиме назад кон поделби и кавги, и нема показатели дека се влегува во нови безбедносни закани и ризици.

Министерот за надворешни работи на Република Северна Македонија Никола Димитров, денес имаше проштална средба со амбасадорот на Република Литванија во Република Северна Македонија, со седиште во Будимпешта, Раса Каириене.

На средбата беше направен краток преглед на досегашниот развој во пријателските односи меѓу двете земји, при што беше искажано особено задоволство што Литванија беше меѓу првите држави кои го ратификуваа Протоколот за пристапување на нашата држава во НАТО. Соговорниците ја истакнаа заемната заложба за натамошно интензивирање на политичкиот дијалог, преку редовна размена на посети на високо ниво, како и потребата од натамошно продлабочување на билатералната соработка, пред сè на економски план и промоција на туристичките потенцијали.

МНР Димитров упати посебна благодарност до амбасадорот Каириене за нејзиниот личен придонес во унапредувањето на билатералните односи, посакувајќи ѝ успех во нејзината натамошна дипломатска кариера.

Министерството за информатичко општество и администрација и Канцеларијата за информациски технологии и електронска управа во Владата на Република Србија денеска потпишаа меморандум за соработка во областа на дигитализацијата.

Министерот за информатичко општество и администрација Дамјан Манчевски, се осврна на важноста од дигиталната трансформација за подобрување на животот на сите граѓани, преку едноставни алатки за пристап до услугите коишто им се потребни.

„Заложбите на Владата за транспарентност, ефикасност при испорака на услугите и отчетност во работењето на институциите се причина поради којашто донесовме одлука дека е неопходно менување на веб страните на Владата и сите министерства. На овој начин ја реализираме и мерката на којашто сме се обврзале во Стратегијата за реформа на јавната администрација, а тоа е подобрена достапност на институциите за сите граѓани“, истакна министерот Манчевски.

Како што рече тој, веб страните на институциите се со застарен дизајнерски пристап, се фокусираат само кон вести и соопштенија и не се сервисно ориентирани, односно нудат многу малку услуги за граѓаните. Најчесто не исполнуваат задоволителни стандарди за безбедност, не се пристапни за луѓе со попреченост и не дозволуваат унапредување и посериозно редизајнирање.

Целта што треба да се постигне е новите веб страни да бидат сервисно ориентирани и насочени кон информирање на граѓаните за работата на институциите, но и за зголемување на транспарентноста преку активно објавување на стратешки документи и информации од јавен карактер. Тоа значи дека веб страните ќе бидат место каде граѓаните првенствено нема да се информираат за активностите на министрите, како што е тоа случај сега, туку ќе ги добиваат потребните информации за услугите коишто им се потребни.

„Во овој процес наидовме на поддршка од Република Србија, односно од Канцеларијата за информациски технологии и електронска управа, коишто поминуваат низ сличен процес на трансформација на веб страните. Меморандумот за соработка којшто денеска го потпишуваме има за цел размена на знаење и презентација на нивниот концепт. Крајна цел е преку учење од нивното искуство да создадеме веб страни коишто целосно ќе одговараат на потребите на нашите граѓани“, информираше министерот Манчевски.

Министерот за економија Крешник Бектеши присуствуваше на свеченото отварање на првиот ритеил парк во Македонија – Поинт ретаил парк. Вкупната инвестиција на компанијата Али Тобако во овој шопинг центар кој што се наоѓа во општината Бутел изнесува девет милиони евра, а ќе бидат отворени 200 нови работни места. Министерот Бектеши истакна дека оваа инвестиција е уште еден доказ за одличните услови и еднаквиот третман кои ги добија домашните инвеститори во земјава со Законот за поддршка на инвестициите, што беше едно од основните барања на бизнис заедницата во изминатиот период.

„Отварањето на ваков Ритеил парк ја зголемува атрактивноста на земјата како туристичка и, во случајов, шопинг дестинација, отворајќи можност за зголемување на бројот на туристи, пред сѐ од соседните земји во градот Скопје, кој со скоро 340 илјади домашни и странски туристи минатата година беше најпосетуваната туристичка дестинација во земјата. Од друга страна концептот кој што го нуди овој прв Поинт Ритеил парк кај нас, кој што е развиен во целиот свет, и големиот број на содржини кои ги задоволуваат потребите и вкусовите на различни генерации на граѓани, верувам дека ќе придонесе овој комплекс да се претвори во посакувано место за целото семејство и популарно врталиште во кое ќе можете да ги споите извршувањето на обврските и релаксацијата, а за најмладите и забавата. Оваа инвестиција од девет милиони евра во општината Бутел, на стратешка локација која ги поврзува населбите Центар, Карпош, Бутел и Чаир, каде според најавите на сопственикот ќе бидат отворени над 200 нови работни места, ќе придонесе за локален, регионален,но и развој на националната економија, истакна министерот Бектеши на свеченото отварање на Поинт ритеил парк.

Според сопственикот Али Ќаили, ова е инвестиција која ќе влијае позитивно на градот Скопје и државата генерално, позиционирајќи ја Македонија како лидер во регионот.

„Многу сме среќни и горди што денеска го отвораме првиот ретаил парк кај нас, кој со својот принцип на работа ќе постави темели на еден поинаков модерен и европски концепт, кој во иднина може да претставува пример и што направивме инвестиција на која сите ќе бидат горди. Поинт ритеил парк е инвестиција која ќе ги отвори вратите за околу 200 лица и која вреди околу девет милиони евра. Сакам на нагласам и дека овде во Поинт ќе можете да видите познати и реномирани домашни и странски брендови и воедно ќе искористам и да им се заблагодарам на сите закупци кои го препознаа нашиот план и ја препознаа нашата инвестиција”, изјави Али Ќаили, сопственик на Поинт ритеил парк.

Според градоначалникот на Општина Бутел, Велимир Смилевски, оваа инвестиција ќе ја позиционира Општинaта на едно повисоко ниво.

„Општина Бутел е навистина горда што првиот ритеил парк во Македонија се отвара токму тука. Јас како градоначалник сум особено горд што со оваа инвестиција ќе се влијае на локалниот економски развој на Општината и ќе влијае на нејзина модернизација. Сигурни сме дека оваа инвестиција ќе ги привлече сите граѓани од Скопје и другите градови од регионот да бидат редовни посетители”, изјави градоначалникот на Општина Бутел, Велимир Смилевски.

Во Поинт ритеил парк ќе има голем број познати домашни и странски брендови.

Владата на Република Северна Македонија на денешната 144-та редовна седница, ја разгледа и усвои Информацијата за формирање Работна група за презентација на Република Северна Македонија на ITU Telecom World 2019 и го задолжи министерот за информатичко општество и администрација Дамјан Манчевски да ја состави и предводи нашата делегација на овој настан, кој претставува можност за промоција и привлекување странски инвестиции во Република Северна Македонија во сферата на телекомуникациите и ИТ секторот, како и поврзување со потенцијални партнери од областа на дигитализацијата на глобално ниво.

Дополнително, присуството на овој настан отвора можност за презентирање на бизнис климата и постигнатите резултати во областа на телекомуникациите во Република Северна Македонија, како и презентација на можностите за трет мобилен оператор во земјата.На оваа своја седница Владата на РСМ го прифати предлогот за проширување на Програмата за наводнување на Северна Македонија. Во врска со оваа точка, Владата го задолжи Кабинетот на заменикот на претседателот на Владата на Република Северна Македонија задолжен за економски прашања и за координација со економските ресори, да ја координира работата во врска со проширувањето на Програмата за наводнување на Република Северна Македонија преку обезбедување на дополнителни средства од развојниот заем на Владата на СР Германија и КФВ банката, во насока на прифаќање на зголемениот развоен заем во износ од 80 милиони евра и грант средствата од 2,8 милиони евра.

Владата денеска ја разгледа и усвои Информацијата за статусот на реализација на Националниот акциски план за Отворено владино партнерство 2018-2020 година (полугодишен извештај за периодот септември 2018 – февруари 2019 година).Владата на денешната седница го прифати како свое мислењето на Министерството за информатичко општество и администрација за согласност на барањето за давање на автентично толкување на член 105 став 3 од Законот за аудио и аудиовизуелни медиумски услуги, поднесено од пратеникот Драган Данев. Членот 105 од Законот за ААВМУ предвидува дека Националната радио телевизија (НРТ) може да остварува дополнителен приход од продажба на програма и услуги, како и од комерцијални комуникации и со барањето за автентично толкување се отвора можност на НРТ да ѝ биде олеснет пристапот за склучување договори за права од меѓународни спортски натпревари и настани кои претставуваат посебен јавен интерес за граѓаните на Република Северна Македонија.

Неизвесна е лидерската средба што премиерот Зоран Заев ја најави за во петок во Клубот на пратениците, откако лидерот на ВМРО-ДПМНЕ Христијан Мицкоски вчера соопшти дека не гледа потреба да присуствува на средба на која, како што рече, ќе се разговара за се, а не за тоа што и е потребно на земјава – предвремени парламентарни избори. Поканата за лидерска средба ја прифатија лидерите на ДУИ и Алијанса за Албанците Али Ахмети и Зијадин Села.Премиерот Зоран Заев вчера во интервју за МИА ги повика сите поканети, меѓу кои и лидерот на опозициската ВМРО-ДПМНЕ, Мицкоски да присуствува на лидерската средба, на која, како што рече, веќе ги номинирал темите, но има можност и е отворен и за други теми, да бидат предложени од политичките партии.